Celtics, 2-0 na batok Raptors

CEBU, Philippines — Mirehistro og playoff career-high 34 puntos si Jayson Tatum, samtang si Marcus Smart     milansang og lima ka tres sa katapusang kuwarter sa dihang ang Boston Celtics mi-rally aron pahamtangan og laing kapildihan ang defending champions Toronto Raptors, 102-99 sa NBA kagahapon didto sa Orlando, Florida.

Sila si Kemba Walker ug Jaylen Brown nagkumboya'g 33 puntos alang sa Celtics nga nagkupot na karon og 2-0 nga bentaha batok sa Raptors sa ilang sa "best-of-seven" Eastern Conference semifinal series.

Tabla ang iskor 28-28 human sa unang kuwarter, apan ang Celtics mibulhot ngadto sa 78-70 nga labaw padung ngadto sa katapusang 10 minutos sa aksiyon.

Si O.G. Anunoby miiskor og 20 puntos, si Fred VanVleet mitapos uban ang 19 puntos ug pito ka assists, samtang si Pascal Siakam mitali og 17 puntos alang sa Raptors nga dunay daghang tsansa nga makatabla apan naunay sa daghan nilang mga sipyat sa naghinapos nga bahin sa duwa. Si Kyle Lowry milansang og duha ka free throws sa katapusang 16 segundos, apan igo lamang kining nagpasikit sa Raptors ngadto sa 99-100.

Ang Celtics mitubag sab dayon pinaagi sa pag-iskor sa krusyal nilang posisyon aron pagsilyo sa kulbahinam nilang daog.