Ala gym nanirado

CEBU, Philippines — Nanirado na sa hingpit ang ALA Gym human sa 35 ka mabulukon nga tuig paghulma og mga kampiyon sa amateur ug pro ug ingon sa pagtabang sa mga pobreng boksidor nga makab-ot ang ilang damgo ug makahatag og haruhay nga kinabuhi sa ilang pamilya.

Ang makapakurat nga balita kabahin sa pagsira sa ALA Gym unang gipahibawo sa Banat News ni WBC No.1 minimumweight contender Melvin 'El Gringo' Jerusalem, kinsa miingon nga si ALA founder Antonio 'Bidoy' L. Aldeguer misulti kaniya sa kinasingkasing nilang panag-estoryaanay sa wala pa siya mipauli sa Manolo Fortich, Bukidnon nga ang ALA Gym mohunong na sa ilang operasyon.

"Wala na'y ALA boxing sir. Nag-estorya mi ni sir ALA ug iya ko gitambagan nga mangita na lang og maayo nga promoter kay sayang if dili madayon ako world title fight," matud pa ni Jerusalem upat ka adlaw sa wala pa ang ALA Boxing mipagawas og opisyal nga pamahayag kabahin sa pagsira niini gumikan sa nagpadayong pandemiya ug sa pagkasira sa TV partner niining ABS-CBN.

Giestablisar niadtong 1985, ang ALA Boxing maoy responsabli pagpahigayon sa makasaysayanong mga away ug world-class nga promosyon sa Pilipinas ug ingon man pagbaid sa pipila ka bug-at nga mga pangan sa Philippine boxing apil na niini sila si former four-division world champion Donnie 'Ahas' Nietes ug kanhi world champion Merlito 'Tiger' Sabillo ug Milan 'El Metodico' Melindo.

Lain pang mga produkto sa ALA Gym mao sila si kanhi WBC flyweight champion Malcolm 'Eagle Eye' Tuñacao ug ang maguwang niining si Noel 'The Eel' Tuñacao, kanhi WBC light flyweight title-holder Rodel 'Batang Mandaue' Mayol, kanhi  OPBF champions Randy 'Kumong Bato' Suico ug Revero 'The Gentle Giant' Santillan, Philippine champions Dindo 'Diesel' Castañares, Wyndel Janiola ug Eriberto 'Yukka' Gejon ug world title challengers Rey 'Boom Boom' Bautista, Z 'The Dream' Gorres, AJ 'Bazooka' Banal, Jonas 'Zorro' Sultan, Bert 'Ninja' Batawang, 'King' Arthur Villanueva, ang managsuong Albert ug Jason Pagara, Michael Domingo ug Mark 'Magnifico' Magsayo ug uban pa.

"After 35 years, ALA BOXING (ALA Promotions and ALA Gym) would like to say Farewell and Thank you to our supporters from all over the World," matud pa sa ALA Boxing. "The Pandemic and the closure of our long time Broadcast Network partner ABS-CBN, has affected the over-all situation and future of the company."

"All our fighters will be released so they can look for greener pastures for their respective careers. ALA boxing would not be where it is today without the tremendous support of the boxers, trainers, office staff, fans, the media, the boxing organizations, and our sponsors all these years," dugang pa niini.

Apil sa mga nindot nga gidalit sa ALA Boxing mao ang makasaysayanong away ni Edito 'ALA' Villamor, Gerry Peñalosa ug ALA Boys niadtong 1990s, ang labing dako nga boxing event sa Tagbiliran City niadtong 2005 diin ang misalida ang garbo sa mga Bol-anon nga si Rey 'Boom Boom' Bautista, ang WBO world title fight nilang Z 'The Dream' Gorres ug Fernando Montiel niadtong 2007 sa Cebu City Sports Center, ang Boxing World Cup “Philippines vs Mexico “ didto sa Sacramento, California, ug ang away ni Nonito Donaire sa Cebu City Sports Center niadtong 2016.

Ang ALA Boxing sab maoy utok sa Pinoy Pride, ang labing malampuson ug labing taas nga boxing series sa Asya nga ilang gilusad niadtong 2010. Gawas sa wa'y hunong niining programa sa amateur boxing sa milabay'ng 30 ka tuig, ang ALA mihimo sab og marka isip bugtong kompanya sa Pilipinas nga nakapasiugda og promosyon gawas sa nasud didto sa Dubai ug Amerika.

"All these memorable events and accomplishments would not have been possible without all of you. The past and present ALA boxers, the trainers, the office staff, the media, the fans, the boxing organizations, sponsors and our boxing family from all over the world," sumala pa sa ALA. "We would like to thank you all very much from the bottom of our hearts for all your support the past 35 memorable years. We cannot ask for more."