Top CESAFI rookies dinapit sa Magis Eagles TV

CEBU, Philippines — Mga top rookies sa juniors basketball sa miaging season sa Cebu Schools Athletic Foundation, Inc. (CESAFI) maoy mga dinapit sa ikalimang edisyon sa Magis Eagles TV karong adlawa. Kini mao sila si Josepth Arth Nalos sa University of Cebu (UC) Junior Webmasters, Joel Nathan Requioma sa Sacred Heart School-Ateneo de Cebu (SHS-AdC) Magis Eagles ug Nathaniel Montecillo sa University of San Carlos (USC) Baby Warriors.

Ang tulo maghisgut sa bisan unsang matang sa ilang kinabuhi ug ingon man motubag sa mga pangutana nga giandam sa mga hosts ug gikan sa fans sa senemanang sports chat nga makita live sa Facebook page sa Magis Eagles Basketball Team sugod sa alas-7:30 sa gabii.

Gilusad niadtong Hulyo 3, tuyo sa Magis Eagles TV mao ang pagmintinar sa panagdait sa komunidad sa basketbol dinhi sa Sugbo pinaagi sa online ning panahona nga nahunong pa ang tanang mga kalihukan sa paugnat sa kusog gumikan sa pandemiya.

Gikatakda matag Biyernes sa alas-7:30 sa gabii, ang Magis Eagles TV sa kanunay bibo gumikan sa pagdala sa mga hosts niining sila si Hejie Suralta ug Eunilyn Chua nga parehong magtutudlo sa Ateneo de Cebu.