Kon mokuyanap ang virus sa 'bubble' lagmit mapakgang pagbalik sa NBA

CEBU, Philippines — Subli nga namahayag si NBA commissioner Adam Silver nga kon ugaling mokuyanap ang virus sa giplastada nilang 'bubble' didto sa Walt Disney World sports complex, lagmit moresulta kini sa ikaduhang pagkabalda sa season sa liga. Si Silver nangagpas nga duna gyu'y mga players nga magtapok didto sa Orlando nga magpositibo sa coronavirus ilabi kadtong gikan sa mga teams nga unang mitaak sa Florida.

Apan kon ugaling dunay lab-as nga mga kaso sa Covid-19 bisan og ang mga players miagi na og  kwarantin nga ilang ipatuman, si Silver miangkon nga makahimo kini og dakong kadaut sa liga.

Kon mahitabo kining maong senaryo, si Silver nagkanayon nga wala sila'y laing mahimo kondili ang pagsira og balik sa liga.

Ang kasamtangang NBA season nga nahunong sud sa upat ka bulan gumikan sa pandemiya gikatakda nga magsugod og balik karong Hulyo 31 diin 22 ka teams ang mag-ilog alang sa 16 ka luna sa playoffs nga moarangkada karong Agosto 17.