Marcial lagmit adto mapunta sa mp promotions
CEBU, Philippines — Ang Pinoy'ng boksidor nga si Eumir Marcial nakadawat og daghang mga tanyag aron mag-pro.
Apil na niini ang gikataho nga makadani nga tanyag gikan sa tinamod nga Amerikanong manedyer nga si Shelly Finkel nga atua magbasi sa New York.
Apan sa dagan karon sa mga panghitabo, si Marcial lagmit mopasilong sa landong sa MP Promotions ni Manny Pacquiao kon ugaling makadesider na siya sa hingpit nga mosud sa kalibotan sa pro boxing.
Usa ka kasaligang tinubdan nga dili gustong magpaila kay dili siya otorisado nga mosulti sa kampo sa MP Promotions, mibutyag sa Banat News nga si Marcial ug ang kompanya ni Pacquiao hapit na magkauyon sa usa ka kontrata.
"Barring any hitches, Marcial may strike a deal with MP Promotions a week or two from now," matud pa sa maong tinubdan.
Ang maong pangangkon gipaluyohan mismo ni Marcial sa pag-angkon ngadto ni Joey Villar sa The Philippine STAR nga nag-estorya sila ni Pacquiao niadtong Martes ug giingnan siya sa senador nga tabangan siya niini aron molampos.
"He’s one of my idols and he told me if I go to him he will help me,” sumala pa ni Marcial.
Kay gihatagan og gibug-aton ang nasudnong garbo, gusto sa 23-anyos nga Zamboangeno nga makakuha siya og kontrata diin walay makapugong kaniya gikan sa pagsilbe sa national team partikular na ang Olympics, Asian Games ug Southeast (SEA) Games.
Kon ugaling usa na siya ka pro, prayoridad gihapon ni Marcial ang iyang kampanya sa Tokyo Olympics sunod tuig diin siya misaad nga moaway hangtod sa katapusang patak sa iyang dugo aron tunolan ang Pilipinas sa gihandum niining labing unang Olympic gold medal.
- Latest
