Gobert mihimakak
CEBU, Philippines — Gihimakak ni Utah Jazz bigman Rudy Gobert ang mga balita nga nagusbat ang ilang relasyon sa iyang teammate nga si Donovan Mitchell.
Matud pa ni Shams Charania sa The Athletic, nga ang pagtagdanay sa duha ka mga bitoon sa Jazz nagka-aslom human sa ilang kasinatian sa COVID-19 ug nga si Mitchell nagdumili paghilot sa nagkalamat nilang relasyon.
Apan segun sa taho ni Tim MacMahon sa ESPN kagahapong adlawa, si Gobert nagkanayon nga gipadako ra ang maong isyu dayong insister nga walay away nga nahitabo kanilang duha. Gani bag-ohay pa silang nagka-estorya sa labing unang higayon.
Gipasabot ni Gobert nga natural lamang sa mga tawo nga usahay dili magkasinabtanay kay dili man perperkto ang tanan.
Iya hinuong gipaneguro nga nagkasinabot silang Mitchell uban ang susamang tinguha nga mao ang pagsuway og langkat og korona alang sa Jazz.
"It's true that we didn't speak for a while after this, but we spoke a few days ago," matud pa ni Gobert sa usa ka video nga iyang gipost sa Instagram Live. "We're both ready to go out there and try to win a championship for this team."
Si Gobert mao ang labing unang NBA player nga nagpositibo sa virus nga miresulta sa pagkasuspenso sa liga. Si Mitchell mao lamang ang laing player sa Jazz nga nataptan sa virus gumikan sa sikit niyang inter-aksiyon ni Gobert.
Sila si Gobert ug Mitchell parehohg gideklarar nga luwas na gikan sa coronavirus duha ka semana human magpositibo ang ilang resulta.
- Latest
