Alang ni coach Tim Cone 5 ka Pinoy nga makaduwa unta sa NBA
CEBU, Philippines — Alang ni Barangay Ginebra coach Tim Cone, dunay lima ka Pinoy'ng basketbolista nga makaduwa unta sa NBA.
Kini mao sila si Johnny Abarrientos, Jun Limpot, Jayson Castro, June Mar Fajardo ug Stanley Pringle.
Si Abarrientos, nga karon 49-anyos na, nakaduwa og 17 ka seasons sa PBA niadtong 1993 ngadto sa 2010. Nakasul-ot siya og uniporme sa Alaska, Pop Cola, Coca-Cola ug Ginebra. Siya maoy MVP niadtong 1996, kaduha nakadaog og Finals MVP ug nakampiyon sud sa 12 ka higayon.
Ang 48-anyos nga si Limpot maoy No. 1 overall pick niadtong 1993 PBA Draft ug nakaduwa sud sa 14 ka seasons sa Sta. Lucia Realty, Ginebra ug Purefoods hangtod niadtong 2007. Siya maoy Rookie of the Year niadtong 1993 ug nakampiyon uban sa Purefoods niadtong 2006 Philippine Cup.
Sa iyang bahin, ang 33-anyos nga si Castro maoy No. 3 pick sa 2008 PBA Draft sunod nilang Gabe Norwood ug Jared Dillinger. Kaduha siya na Finals MVP ug kaunom nakadaog og titulo uban sa Talk 'N Txt. Giyukboan siyang No. 1 pointguard sa Asya human gipangulohan ang Pilipinas niadtong 2013 ug 2015 FIBA Asia Cup.
Ang Sugboaong si Fajardo maoy No.1 overall pick sa 2012 draft. Mikulit siya og kasaysayan human nakadaog og unom ka sagunson nga regular season MVP awards. Walo ka higayon nga siya nakampiyon uban sa San Miguel Beermen ug nakarepresentar sa Pilipinas niadtong 2014 ug 2019 FIBA World Cup.
Samtang si Pringle maoy No.1 pick niadtong 2014 ug Rookie of the Year niadtong 2015. Nakampiyon siya uban sa Ginebra niadtong 2019 Governors' Cup.
- Latest