Team Lebron midaog sa Team Giannis

CEBU, Philippines — Si Kawhi Leonard maoy labing masidlakon nga bitoon sa dihang gibuntog sa Team LeBron ang Team Giannis, 157-156 sa NBA All-Star Game nga gisaksihan og 20,900 ka fans kagahapon didto sa United Center sa Chicago, Illinois.

Ang alas sa Los Angeles Clippers mihipos og 30 puntos uban ang pito ka rebounds hinungdan nga siya maoy gitunolan sa bag-ong Kobe Bryant MVP award. 

Ang tropeyo ginganlan gikan sa Los Angeles Lakers legend nga namatay uban ang iyang anak nga si Gigi ug lain pang pito ka mga tawo sa makalisang nga helicopter crash tulo ka semana ang milabay.

Atol sa pagdawat niya sa tropeyo, gipasalamatan ni Leonard si Kobe nga dako og natabang sa paglambo sa iyang karera.

"I want to thank Kobe for everything he has done for me, all the long talks and workouts. Thank you," matud pa ni Leonard.

Ang Team LeBron naglabaw lamang og usa ka lugas, 156-155, apan si Anthony Davis milansang og usa ka free throw aron silyohan ang ilang daog. Subay sa format ning All-Star Game, ang team nga unang makatali og 157 puntos awtomatik nga maoy daog.

Si Giannis Antetokounmpo maoy nangu sa iyang koponan uban ang 25 puntos ug 11 ka rebounds.

Samtang si LeBron James mibuak sa gisaw-an nilang record ni Kobe Bryant sa ika-17 niyang salida sa All-Star Game.

Apan ang gishigutan ni James dili ang kaugalingon niyang record kondili ang legasiya ni Kobe.

"His legacy is living on every single day with us," asoy pa ni James, kansang team nakadaog og $400,000 nga premyo nga ilang idonar sa Chicagoland youth charity nga Chicago Scholars.

Gawas nilang James ug Leonard, si Magic Johnson mikuha sab og atensiyon sa pagbayaw niini ni Kobe atol sa emosyonal kaayong pre-game ceremony.

"We'll never see another basketball player quite like Kobe," sumala pa ni Johnson. "Scoring 81 points in one game. 

Scoring 60 points in his last game. And then winning five NBA championships."