Lady Blazers hinataw ang Lady Knights, lider na

MANILA, Philippines — Ipinako ng College of Saint Benilde ang mabilis na 25-20, 25-18, 25-15 panalo laban sa Colegio de San Juan de Letran para masikwat ang solong pamumuno sa NCAA Season 95 wo­men’s volleyball tournament kahapon sa The Arena sa San Juan City.

Bumandera si Chelsea Umali sa matikas na kamada ng Lady Blazers matapos magrehistro ng pitong hits upang pamunuan ang Taft-based squad sa pagkopo ng ikatlong sunod na panalo.

“Every game ang focus namin. Dapat parating hundred percent kami. Sa team namin, may Team 1 at Team 2 kami na ginagamit. Gusto namin na lahat nagko-contribute talaga,” ani Benilde assistant coach Jay Chua.

Nahulog sa ikalawa ang nagdedepensang Arellano University sa 2-0 baraha.

Umiskor naman ng tig-anim na puntos sina Michelle Gamit, Jade Gentapa at Klarisa Abriam habang may tig-lima naman sina Mycah Go, Gayle Pascual, Marites Pablo at Kaila Miranda para sa Benilde.

Malakas na puwersa ang inilatag ng Lady Bla­zers sa attack line matapos magbaon ng 39 hits kumpara sa 28 ng Letran.

Lamang din ang Lady Blazers sa service area (8-3) at blocking department (5-3).

Nanaig naman ang Mapua University sa Emilio Aguinaldo College, 21-25, 25-23, 25-23, 25-22, upang sumampa sa win column.

Sa men’s division, naduplika ng Benilde ang selebrasyon matapos patumbahin ang Letran, 25-21, 25-16, 25-22, sa likod ng impresibong laro ni Vince Abrot na kumana ng 12 attacks, dalawang aces at isang block.