Ginebra moposte'g 2-1 nga bentaha

CEBU, Philippines — Nanganti si Barangay Ginebra Kings coach Tim Cone nga mamawi  ug sakmiton ang  2-1 nga bentaha  batok sa Meralco Bolts sa Game-3 sa ilang best-of-seven finals series sa PBA Governors' Cup karong gabii.

Human mabiyai og kapin sa 20 puntos sa first half, ang Ginebra misuway pag-ilog sa daog atol sa Game-2 niadtong Biyernes, apan nahutdan sila sa kusog hinungdan  nga nakuha sa Meralco ang 104-102 nga daog.

Taliwala sa kapildihan, si Cone miingon nga nalipay siya sa gipakita sa iyang batos sa Game-2, apan miangkon nga  kinahanglan nila nga modoble sa ilang paningkamot ilabi na sa depensa aron makuha pagbalik ang labaw sa serye.

Si Cone mitudlo sa 16 ka mga tres nga gipasud sa Meralco nga maoy nakaingon sa ilang kapildihan.

Gawas pa sa outside shooting sa Meralco nga wala nila mapugngi, nalupig usab ang Ginebra sa bench points.

Sa iyang bahin, si Ginebra import Justin Brownlee wala mihatag og gibug-aton sa PBA record nga iyang nahimo tungod kay mas gusto niya ang kampiyonato alang sa koponan.

Si Brownlee napatik na sa kasaysayan sa PBA isip import nga adunay labing daghan nga three-point shots nga napasud.

Si Brownlee aduna na'y 326 ka mga tres ug nabuak niya ang karaang rekord ni kanhi San Miguel import Lamont Strothers nga 325.