Lakers daog, apan Davis na-injured
CEBU, Philippines – Gilat-an sa Los Angeles Lakers ang New York Knicks, 117-87, apan wala mahingpit ang ilang kalipay gumikan kay na-injured man ang All-Star forward nilang si Anthony Davis sa maong duwa.
Si Davis mibiya sa ikatulong kuwarter kay nabun-og ang bat-ang human sa sakit kaayo niining pagkahagba.
Naangol si Davis sa dihang misuway siya og tapal sa lay-up ni Julius Randle. Nawad-an siya og balanse hinungdan sa makuyaw niyang pagkalagapak sa korte sa nahibilin nga 2:45 sa ikatulong kuwarter.
Nagping-it si Davis sa tumang kasakit dul-an sa duha ka minuto, apan nakabarog ra sab dayon ug hinay-hinay nga milakaw padung sa ilang puwesto.
Negatibo hinuon ang resulta sa X-ray, apan wala na mibalik pa og duwa si Davis.
Si LeBron James mikulit og 31 puntos, samtang si Kentavious Caldwell-Pope midugang og 15 puntos alang sa Lakers nga padayong naghari sa Western Conference bitbit ang 30-7 record.
Sa laing aksiyon, si Carmelo Anthony mikadlit og 28 puntos apil na ang krusyal niyang itsa sa nahibiling 3.3 segundos nga maoy nag-agak sa Portland Trail Blazers ngadto sa 101-99 nga kadaogan batok sa defending champion Toronto Raptors didto sa Scotiabank Arena sa Toronto, Canada.
Nagdanga-danga na unta ang duwa ngadto sa overtime sa dihang nagtabla ang iskor, 99-99, apan ang 35-anyos nga si Anthony mipataop sa iyang tira nga maoy nakapadaog sa Blazers.
Ang alas sa Portland nga si Damian Lillard mitapos uban ang 20 puntos, samtang si CJ McCollum midonar og 10 puntos. Dako sab og natampo sa Blazers sila si Hassan Whiteside ug Anfernee Simons nga nagkumbinar og 26 puntos.
Nalansang pa hinuon sa ikasiyam nga dapit sa Western Conference ang Blazers uban ang 16-22 nga baraha, samtang ang Raptors natagak ngadto sa 24-13.
- Latest