Clippers kaging sa Grizzlies
CEBU, Philippines — Ang Memphis Grizzlies milusad og balanseng ataki tibuok duwa hinungdan nga gikulata niini ang inilog nga Los Angeles Clippers, 140-114, sa NBA kagahapon didto sa Staples Center.
Si Jae Crowder mi-iskor og 27, si Jaren Jackson Jr.midugang og 24 samtang sila si Ja Morant ug Dillon Brooks mikadlit og 22 puntos matag usa alang sa Grizzlies nga migaling sa labing daghan nilang puntos karong season.
"They were faster, quicker, they played harder," matud pa ni Clippers coach Doc Rivers agig pagdayeg sa Grizzlies. "They were clearly the tougher team. Honestly, they deserved to win the game."
Si Montrezl Harrell maoy nangu sa Clippers uban ang 28 puntos samtang sila si Kawhi Leonard ug Lou Williams parehong mipuntos og 24 sa pilderong kawsa.
Labaw nang daan og otso puntos sa halftime, gitiwasan pa sa Grizzliers ang Clippers human sila maoy mitali sa nag-unang siyete puntos sa ikatulong kuwarter.
Wala na makabangon pa ang Clippers human gikat-an og 24 puntos sa Grizzlies padung ngadto sa pinal nga 12 minutos sa aksiyon.
Gumikan sa luya kaayo ug murag way kahayag nilang dinuwaan, ang Clippers gibohan sa dismayado nilang fans.
Misimpatiya hinoon si Rivers sa sentimento sa ilang mga dumadapig ilabi na kay gilubong man sila sa usa sa nangiwit nga teams sa Western Conference.
- Latest
