Hontiveros gidasig mga batan-ong atleta

CEBU, Philippines — Si kanhi PBA star Dondon Hontiveros nga konsehal na karon sa Dakbayan sa Sugbo maoy pinasidunggang dinapit sa duha ka managlahing kalihukan sa paugnat sa kusog kagahapon. 

Nagmabungahon ang iyang adlaw human niya gipaambit ang mga leksiyon nga iyang nakat-onan sa kinabuhi pinaagi sa sports ngadto sa mga batan-ong atleta.

Atol sa pagbukas sa National Age-Group Chess Championships-Visayas leg didto sa Cube Wing atrium sa SM Seaside City, si Hontiveros miingon nga ang kinabuhi sama sa usa ka duwa sa chess, kinahanglan nga duna kay plano sa dili pa mohimo og lakang.

"Life is like a game of chess.  The results depend on the steps you take," matud pa ni Hontiveros agi'g pagdasig sa dul-an 400 ka players nga misalmot sa tulo ka adlaw nga torneyo nga gipasiugdahan sa National Chess Federation of the Philippines (NCFP) inabagan sa Cebu Chess Society.  

Gisaysay sa 42-anyos nga konsehal nga sa wala pa niya makab-ot ang kalamposan nga iyang natagamtaman karon, nag-agi siya og daghan kapakyasan. Apan iya kining gihimo nga motibasyon aron ma-angkon ang iyang mga pangandoy sa kinabuhi.

"As an aspiring basketball player, I have my sets of failures," batbat pa ni Hontiveros. "But I turned all my frustrations into a motivation, and eventually as my ladder to success. That is also what I would like you to do. To reach your goals, find a way how to recover from your failures, grow as a person, and become better than you were before."

Sa sayo pa didto sa Cebu City Sports Institute, gidayeg ug gipasalamatan ni Hontiveros ang mga partisipante sa 2020 Mayor's Cup Under 16 Invitational Basketball Tournament gumikan sa malumo nilang kasingkasing sa pagsangon nga idonar nga ganting salapi nga itagana unta sa mga mananaog ngadto sa mga biktima sa sunog didto sa Duljo Fatima.

"I am most thankful that you are not thinking of the prizes in joining the tournament. It speaks well of your coaches, it speaks well of your parents,"  sumala pa ni Hontiveros. "Your purpose of coming here is for exposure, to further enhance your skills but the good thing is that in return, you are helping others in need."

Gawas sa mga Sugboanon, ang duha ka adlaw nga aksiyon gisalmotan og mga basketbolista gikan sa Ormoc, Cagayan de Oro ug Manila.