Pito na ka teams kompirmadong mosalmot sa laba Sinulog Cup 2020

CEBU, Philippines — Aduna na’y pito ka teams ang mipadayag sa ilang partisipasyon sa Los Amigos Basketball Association (LABA) Sinulog Cup 2020 nga gikatakdang sugdan sa Enero 10 diha sa Co Tiao King gym sa Barangay Tabok, Dakbayan sa Mandaue.

Ang mga koponan nga nikompirmar mao ang defending champion Villalon-Bamba, runner-up Monterroyo-Jordan, Alcover, Buenavista, Sebandal, Quiñahan ug Coloscos.   

Ang katapusang adlaw pagduso sa final line-up kutob lang karong Enero 6.

Matud pa ni LABA president P/Capt. Dondon Coloscos, nga ang kada team manager adunay lima ka protected players. Ang ubang nahibilin ipaagi sa bunot-bunot kon asa siya nga team moduwa.

Unom ka teams ang kuhaon human sa elimination round diin ang top 2 otomatik nga moabante sa semifinals.

Ang nahibiling upat moagi pa sa quarterfinals. Ang No. 3 moharong sa No. 6 ug ang No. 4 mobatok sa No. 5.

Ang modaog sa No. 3 ug No. 6 maoy makigsakbang sa No. 2 sa semis, samtang ang modaog sa No. 4 ug No. 5 maoy mokontra sa No. 1.

Ang mga modaog maoy mag-abot sa finals, samtang ang mga pildero magsangka na lang alang sa ikatulong dapit.

Gipahibalo sab ni Capt. Coloscos nga mao na sab kini ang katapusan niyang pagdala sa liga kay mapupos na ang iyang termino isip presidente sa LABA.