Sunday.com 6th Conference League buksan karon

CEBU, Philippines — Dili na gyud kapugngan, buksan na ang gikahinaman nga   Sunday.com  6th Conference Basketball League  karong adlawa diha sa Mandaue City Cultural and  Sports Complex.

Sa dili pa ang game proper, morampa una ang mga partisipanteng koponan uban sa tagsa-tagsa nila ka muse sulod sa maong sports complex sa alas-7 sa buntag.

Isunod dayon ang mubo nga programa diin si Centro Barangay Captain Ian Cortes maoy pinasidunggang dinapit ug mamumulong.

Mohatag sab sa ilang  mahinungdanon nga mensahe si  ballclub president Tata Nadera ug adviser Atty. Sally Malig-on.

Molamas sa maong programa mao ang pagpili og 'best in uniform' ug 'best muse'.

Pito ka koponan ang magtigi sa kampiyonato nga pangulohan sa defending champion Bulldogs ni playing team manager Tata Nadera.

Ang laing unom ka koponan uban sa ilang team manager mao ang IMed ni Junaide Alidajao, Unisol ni John Paul Espija, New Bloods ni Neil Ibarita, Half Baked ni Ian Sampang, Yamaha ni Alfred Pasana ug 3Coins ni Ray Neiz.

Si Nadera nga mao sab ang ballclub president,  mipahibalo nga ang pito ka teams moduwa og single round robin format sa elimination diin ang top 4 teams moabante sa semifinals.

Ang team nga walay pilde sa unom ka duwa sa eliminasyon makabaton og 'twice-to-beat' advantage sa semis.

Ang mga mananaog maoy mag-ilog sa titulo, samtang ang mga pildero magsangka na lang sa ikatulong puwesto.

Ang mga koponan  magsubay og barangayan o barkadahan format aron ang tanang partisipante mahatagan og higayon nga makaduwa ning maong liga nga gipaluyohan ni Mandaue City Mayor Jonas C. Cortes, Congressman Lolypop Ouano-Dizon, Board Member Jonkie Ouano, Alex Malakooti, Mr. & Mrs. Naig, Wendell Suico ug Tata Nadera.