Team France kampiyon sa PPFC Christmas League 2019
CEBU, Philippines — Nagkumbinar og 32 puntos sila si JR Daganta ug Archie Lobaranes alang sa Team France nga mipilde sa Team Spain aron modaog sa kampiyonato sa Paknaan Physical Fitness Club (PPFC) Christmas League 2019 niadtong Domingo.
Ang MVP nga si Daganta mibagnos og 17 puntos, samtang si Lobaranes mipugnit og 15 puntos aron pangulohan ang balanseng opensiba sa Team France nga naglumpayat sa tumang kalipay human sa maong kadaogan.
Mipakitang gilas sab silang Kim Ragada ug Andy Cuadero nga parehong mipupo'g 10 puntos aron tabangan ang Team France paglangkat sa korona.
Si Jun Calderon mikadlit og 18 puntos ug maoy nangulo sa lima ka mga magduduwa sa Team Spain nga mirehistro og double figures.
Laing mihimo'g double digits sa Team Spain mao si Ariston Corbo nga mikulit og 13 puntos, sila si Arnel Arnaiz ug Dodong Ylanan mitampo'g 11 puntos matag usa.
Si Dodo Gallardo miambit og 10 puntos sa Team Spain, kansang pangandoy nga makampiyon daw sama sa usa ka damgo nga sa pagmata kalit lang nga nahanaw.
Puntos Matag Usa
FRANCE (82) – JR Daganta 17, A. Lobaranes 15, K. Ragada 10, A. Cuadero 10, JE Nuñez 8, J. Daganta 6, A. Alimpoos 5, T. Lerio 5, Torno 2, Villegas 2, R. Sotana 2.
SPAIN (72) – J. Calderon 18, A. Corbo 13, A. Arnaiz 11, D. Ylanan 11, D. Gallardo 10, J. Soco 6, J. Castañeda 3.
- Latest
