Casimero moaway na alang sa WBO title
CEBU, Philippines — Suwayan ni WBO interim bantamweight champion John Riel 'Quadro Alas' Casimero (28-4, 19KOs) nga moiskor og paspas ug makapakugang nga daog sa dihang iyang sangkaon si WBO regular bantamweight champion Zolani Tete (28-3, 21KOs) sa South Africa karong buntag didto sa Arena Birmingham sa Birmingham, England.
"Yes, tumbahon gyud ni nako siya (Tete) para wa na'y masulti," matud pa sa garbo sa Ormoc City.
Kon ugaling molampus, ang 30-anyos nga si Casimero makig-uban sa halangdong mga pangan nga naglangkob nilang Manny Pacquiao, Nonito Donaire Jr. ug Donnie Nietes isip mao lamang mga Pinoy'ng boksidor nga nakadaog og tulo ka world titles sa managlahing weight division.
Lagmit nga makahatag sab kini kaniya og oportunidad nga makaaway alang sa usa ka unification bout batok ni IBF ug WBA bantamweight champion Naoya Inoue sa Japan sunod tuig.
Dili hinuon sayon nga tahas ang sagubangon ni Casimero gumikan kay lig-on man nga pader ang iyang banggaon nga mao si Tete, kinsa walay pilde sud sa 12 ka way sukad pa niadtong 2012.
"We know Casimero is a good fighter, and a former two-time world champion. And of course, he can punch. It’s going to be a good fight come Saturday night (Domingo oras dinhi sa Pilipinas), but on that night, I’ll be victorious. Casimero will go back home, and I will retain my world title," buhagay pa ni Tete ngadto sa Boxing Social.
Mao kini ang ikaupat nga pagdepensa ni Tete sa trono sa WBO nga iyang nasakmit human gipilde si 'King' Arthur Villanueva sa ALA Gym pinaagi sa unanimous decision niadtong 2017.
- Latest
