Clippers pabor mokampiyon
CEBU, Philippines – Ang Los Angeles Clippers maoy gipaboran nga mosakmit sa NBA title sunod season basi sa gihimong survey sa mga NBA general managers kagahapon.
Ang Clippers miani og 46% nga boto sa tanang mga GM sa liga nga mitudlo nila ni Kawhi Leonard ug Paul George nga maoy duha ka yawi sa labing una unyang kampiyonato sa team franchise.
Ang Clippers nag-una sa lista sa mga gitan-aw sa 30 ka general managers nga maghari ug gisundan sa Milwaukee Bucks nga adunay 36%, samtang ang Los Angeles Lakers ni LeBron James ug Anthony Davis gihatagan og 11% nga porsiyento nga mokampiyon.
Gawas sa Clippers, ang reigning MVP nga si Giannis Antetokounmpo gitaw-an usab nga magpabilin sa iyang trono sa sunod season.
Kumbinsido ang mga GM nga ang Greek player mao gihapon ang modominar sa opensa ug depensa sa sunod season. Ikaduhang gitan-aw nga mahimong MVP mao si James.
Alang sa Rookie of the Year, tanang general manager nga ang No. 1 pick sa New Orleans Pelicans nga si Zion Williamson ang lig-ong kandidato alang sa maong award.
- Latest