Obiena muling hinirang na TOPS Athlete of the Month

MANILA, Philippines — Hinirang si Ernest John Obiena, ang unang Filipino athlete na nakakuha ng tiket sa 2020 Tokyo Olympics, bilang “Athlete of the Month” Tabloids Organization in Philippine Sports (TOPS) para sa buwan ng Setyembre.

Nakamit ni Obiena ang nasabing Olympic berth nang lumundag siya ng 5.80-meter qualifying standard sa pole vault sa isang athletics meet sa Chiara, Italy noong Setyembre. 2.

Nagtala ang 23-anyos na anak ni dating pole vault great Emerson Obiena ng 5.81m para talunin ang lima niyang karibal sa gold medal round ng nasabing torneo na may basbas ng International Amateur Athletic Fe­deration (IAAF).

“EJ Obiena’s latest success in pole vault in Chiara, Italy early this month stands out as the most inspiring achievement by the Filipino athletes for September,” wika ni TOPS president Ed Andaya ng People’s Tonight.

Hinirang din si Obiena ng TOPS bilang athlete of the month ng Abril nang angkinin niya ang gold medal sa Asian Athletics Championships sa Doha, Qatar.

Noong Hulyo ay nakuha ng University of Santo Tomas graduate ang gold medal sa Napoli Universiade sa Italy.

Ikinunsidera rin ng TOPS para sa kanilang monthly award sina boxing hero Pedro Taduran Jr., tinalo si Sa­muel Salva sa isang all-Filipino showdown para makuha ang IBF minimumweight crown at chess champions IM Paulo Bersamina at Jan Jodiyn Fronda na nagwagi sa GM Rosendo C. Balinas Memorial Cup at National women’s chess Championship, ayon sa pagkakasunod.