David Justin 4-0 na sa Alegado Cup
CEBU, Philippines — Si Marco Booker Panta miratsada og 24 puntos ug si Chris Yonnel Perolino miduhang og 22 sa dihang gilampaso sa David Justin ang Geobert Store, 106-81 alang sa ikaupat nilang sagunson nga daog sa open category sa 10th Mayor Alegado Cup Inter-Barangay Fiesta Basketball League didto sa Consolacion.
Miamot si Joseph Cabahug og 14 puntos alang sa David Justin ni team owner Dennis Maglasang nga milusad og nagkayong opensiba sa katapusang kuwarter aron pagpatiurok sa Geobert Store.
Labaw lamang og kuwatro puntos human sa tulo ka kuwarter, 79-75, ang David Justin mitak-op sa duwa pinaagi sa pagpabuto og 27-6 nga bomba aron pagbungkag sa Geobert Store.
Sa aksiyon sa inter-barangay, ang Tayud ug Garing miabante na sa finals sa tagsa-tagsa nila ka mga kategoriya.
Sila si Nikolas Felipe Yu, Cassidy Christian Elopre ug Jowil Sugarol nagkumbinar og 40 puntos sa dihang ang Tayud nakaipsot batok sa Jugan, 67-64 aron pagmartsa ngadto sa kampiyonato sa midgets category A.
Ang Tayud makigsangka sa Pulpogan sa best-of-three finals series sunod semana.
Sa midgets category B, ang Garing mitaak ngadto sa final round human gipabakasyon ang Tolotolo, 68-62.
Si Gabriel Alin mitali og 21 puntos, samtang si Junrix Casag midonar og 11 puntos alang sa Garing nga makig-ilog sa titulo batok sa Polog.
- Latest
