Mohon, Pooc, Tabunok pabiling wa'y pilde sa Talisay Mayor's Cup

CEBU, Philippines — Ang Mohon ug Pooc mikadlit sa ikaduha nilang sagunson nga daog sa managlahing paagi sa seniors division sa 2019 Talisay City Mayor's Cup Inter-Barangay Basketball Tournament didto sa Talisay City Sports Complex.

Si Giovanni Tabay mipabuto og 34 puntos sa dihang gimasaker sa Mohon ang Candulawan, 113-66 aron pag-angkon sa liderato sa Bracket A.

Sila si Romby Justiniares, Romel Antimaro ug Dave Boston nagkumbinar og 31 puntos alang sa Mohon  nga mibugawak dayon og kayo pagsugod sa duwa  aron paglubong sa Candulawan og 56 puntos, 95-39 buman sa tulo ka kuwarter.

Sa ilang bahin, ang Pooc nanglimbasog usa og maayo sa  hinapos nga bahin sa duwa sa wala pa tikloa ang Jaclupan, 75-67.

Si Zeus Aguilar mihipos og 20 puntos, si Sonny Marata miiskor og 14, samtang si Ronan Briones miamot og 11 puntos alang sa Pooc nga nakigsawo karon sa Cansojong sa liderato sa Bracket B bitbit ang managsamang 2-0 records.

Sa juniors division, ang Tabunok ug Pooc yanong miinat sa wa'y pilde nilang mga baraha ngadto sa 3-0.

Si Kevin Jason Cabanero mitali og 17 puntos, samtang sila si Oudy Francis Acedo ug Bruce Dale Tan mipupo og 14 puntos matag usa sa dihang gipilde sa Tabunok ang Camp 4 sa iskor nga 92-47 aron pahugtan ang ilang pagkupot sa solong liderato sa Bracket C.

Wala sab magpaalkansi si Hyacinth Balorio nga miposte og 17 puntos ug ingon man sila si Anthony Alvarez, Benz Ybañez ug Shaundyl Alipio nga nagkumboya'g 38 puntos aron tabangan ang Pooc paglubong sa Manipis, 99-58,  ingon man magpabiling hari sa Bracket B.