UV Lancers sugod na ilang kampanya alang sa 4-peat

CEBU, Philippines – Sugdan na sa reigning grandslam champion University of the Visayas (UV) Green Lancers ang ilang kampanya pagkulit og talagsaong 4-peat sa dihang ilang harungon ang University of San Carlos (USC) Warriors sa seniors division sa 19th Cebu Schools Athletic Foundation, Inc. (CESAFI) men's basketball tournament diha sa Cebu Coliseum karon adlawa.

Sa sayo pa, si UV head coach Gary Cortes mipahibalo nang daan nga ang paglansang og upat ka sagunson nga titulo butang nga ilang gipangandaman, apan sa susamang higayon ila sab nga gipreparahan ang  lisud nga hagit nga ilusad sa ilang mga karibal.

Mipasumbingay pa si Cortes nga ang pagkab-ot sa ilang misyon sayon estorayahon, apan sa tinuoray lisud  buhaton.

Apan bisan pa man sa pagbiya ni two-time MVP Rey Anthony Suerte nga mitapon sa University of the East (UE) Red Warriors sa UAAP ug sa pagsibat ni sharpshooter Tristan Albina, nagpabilin nga usa ka lig-ong puwersa ang Lancers.

Ubos sa pagpangu ni Lassina Coulibally, ang 6-foot-8 nilang langyaw nga student-athlete gikan sa Ivory Coast, ang Lancers armado gihapon og hait nga mga point guards nga sila si Sheldon Gahi ug Gileant Delator ug ingon man dekalibreng bigmen nga sila si Jancork Cabahug, Michael Maestre, Ted Saga, Monic Soliva, Jossier Hassan ug Melvin Butohan.

Buhian sab sa Lancers ang bililhon nilang rookie nga si Gabriel Cometa ug ingon man ang duha nilang recruits nga sila si Clyde Drexler Avancena gikan sa University of Southern Philippines Foundation (USPF) ug Joshua Gellacone sa University of Cebu (UC).

Karong alas-6:45 sa gabii, ang Lancers makigharong sa Warriors nga naglaraw nga sundan ang 80-75 nilang daog batok sa USPF Panthers niadtong Septiyembre 1.

Sa gihapon, si USC coach Bong Abad magsandig nilang Somty Managor, Jules Langres, Froilan Mangubat, Magic Marata, Roosevelt Jelinggao, Kurt Trangia, Jomari Ranuco ug Kenneth Brillo sa tinguha nga makasagunson og duha ka daog.

Sa juniors division, ang Don Bosco Greywolves naglaraw sa ikaduha nilang sunod-sunod nga daog sa dihang ilang hamagon ang Southwestern University (SWU)-Phinma Baby Cobras sa alas-5:15 sa hapon.

Ang Greywolves nakaipsot batok sa Cebu Eastern College (CEC) Dragons, 60-57 sa una nilang duwa, samtang ang Baby Cobras gipanitan sa USPF Baby Panthers, 80-94.