Gilas delikado mapilde sa angola sa World Cup

CEBU, Philippines — Ang Angola, usa sa mga makasangka sa Gilas Pilipinas sa preliminary round sa FIBA World Cup, kursonada nga mosulod sa playoffs sa maong  kompetisyon nga sugdan karong Agosto 31 didto sa China.

Ang Angola ug Gilas uban sa Italy ug Serbia ang magpinaksitay sa group stage diin ang top two teams sa standing maoy moabante sa quarterfinals.

Gituohan sa kadaghanan nga ang Angola lang ang posibleng mabuntog sa Gilas,  apan ang coach sa African team mibahad sa ilang mga ikaharong sa group stage.

Timaan nga seryoso sila nga mobihag sa tulo nila ka mga kontra sa first round, ang Angola mohimo og tune-up games batok sa mga Asian contenders nga South Korea ug host China karong semanaha.

Ang  FIBA rank No. 23 nga Angola nga bidahan  ni  veteran center Yanick Moreira gikahadlokan sa African zone diin sila ang 11-time champion.

Gawas ni Moreira, laing bantayanan sa Gilas  mao ang laing bigmen nga sila si Hermegildo Mbunga ug Alexandre Jungo. (BANAT NEWS)