Water market 'grandslam' sa power forty

CEBU, Philippines — Nakampiyon na sab ang Water Market dihang ilang gilumsan ang Stronghold Insurance, 87-72 sa Power Forty Basketball Tournament St. Augustine Cup 2019 niadtong Sabado didto sa Inayawan Sports Complex, Dakbayan sa Sugbo.

Kini ang ikatulong sunod-sunod nga korona nga nahipos sa Water Market aron maangkon ang talagsaong 'grandslam' title. Sila ang kampiyon sa Commissioner's Cup 2017 ug sa President's Cup 2018.

Si Bodak Tantiado miburak og 20 puntos aron mangu sa tanang scorers sa Water Market nga maoy midiktar sa tibuok duwa. Gisundan ni Cocoy Dequit nga adunay 16 puntos.

Sila si Alan Borces ug Don Jereme mitampo'g 14 ug 12 puntos sa maong kadaogan.

Gumikan niini, ang Water Market ni team owner Vez Eleguin mibulsa og P15,000 nga ganting salapi ug tropeyo bugti sa ilang kadaogan.

Anugon kaayo ang 33 puntos ni Joel Cañete kay nasugamak ang Stronghold Insurance ni Atty. Flor Yosores nga mibitbit og P10,000 nga salapi isip runner-up.

Si Jopel Cañete miambit og 11 puntos sa maong kapildihan.

Sa sayo pa, ang Team Sanchez nakaeskapo bitbit ang 88-87 nga kadaogan sa ligas kaayo nga duwa alang sa ikatulong puwesto.

Gipangulohan ni Ting Cabrera ang Team Sanchez nga mipabuhagay og 14 puntos.

Ang AMBL gipangulohan sab nilang Wewe Cabrera ug Dome Labalan nga parehong mikadlit og 20 puntos.

Ang Team Sanchez nilang Gastner Sanchez, Tony Navares ug Gil Magallon nakadawat og P7,000, samtang ang AMBL ni Alan Lim gigantihan og P5,000.

Ang championship game gitumong atol sa ika-30 nga anibersaryo sa Power Forty Ballclub niadtong Hulyo 27.

Dakong pasalamat ni  'El Presidente' Edwin Dejacto Sr. sa tanang teams nga misuporta aron magmalampuson ang maong liga, ilabi na ni Edwin Rabaya, ang team owner sa LJR Ventures nga maoy mihatag sa mga premyo ug tropeyo.

PUNTOS MATAG USA

Unang duwa:

TEAM SANCHEZ (89) - T. Cabrera 14, Dayota 12, Cabatas 12, Ybiernas 11, Magallon 10, Peligro 10, Cantarona 10, Fuentes 10.

AMBL (88) - W. Cabrera 20, Labalan 20, Ocariza 18, Mabatuan 15, Tabar 15.

Ikaduhang duwa:

WATER MARKET (87) - Tantiado 20, Dequit 16, Borces 14, Jereme 12, Eleguin 9, Ozon 4, Sumargo 4, Dejacto 4, Navares 2, Pestaño 2.

STRONGHOLD (72) - Joel Cañete 33, Jopel Cañete 11, Cabreros 9, Abasolo 6, Yosores 5, Mercado 4, Yu 2, Peligro 2.