F2 Logistics may pakay sa PLDT
MANILA, Philippines — Sasarguhin ng Grand Prix Conference runner-up F2 Logistics ang ikalawang dikit na panalo sa pagharap nito sa PLDT Home Fibr sa pagpapatuloy ng 2019 Philippine Superliga All-Filipino Conference ngayong araw sa The Arena sa San Juan City.
Nakatakda ang bakbakan ng Cargo Movers at Power Hitters sa alas-7 ng gabi.
Sariwa pa ang F2 Logistics sa 25-12, 25-21, 25-17 panalo laban sa Generika-Ayala noong Sabado.
Hindi pa naglaro si Filipino-American Kalei Mau subalit hindi naman ito naging problema para kay Cargo Movers head coach Ramil de Jesus dahil malalim ang lineup nito.
Nariyan na si opposite hitter Kim Kianna Dy na galing sa injury para samahan sina Aby Maraño, Majoy Baron, Ara Galang at Dawn Macandili na manduhan ang F2 Logistics.
Bukod pa rito ang pagbabalik ng mga La Salle players gaya nina playmaker Michelle Cobb, Desiree Cheng, Tin Tiamzon at Aduke Ogunsanya.
“Having my players from La Salle and with Kianna returning is a big help. At least now I can rotate a lot of players,” ani De Jesus.
Mapapalaban ang Cargo Movers dahil galing sa magandang experience ang Power Hitters sa isang pocket tournament sa Perth, Australia.
Mangunguna sa atake ng PLDT Home Fibr sina Gretchel Soltones, Aiko Urdas, Jasmine Nabor at Jerrili Malabanan habang hahawakan ang tropa ni coach Roger Gorayeb.
Samantala, magtatagpo ang Generika-Ayala at Marinerang Pilipina sa alas-2 ng hapon kasunod ang duwelo ng Foton at Sta. Lucia Realty sa alas-4:15.
- Latest