Ikaupat nga daog tirada sa UC
CEBU, Philippines — Ang Joemang's Surplus-University of Cebu (UC) Webmasters naglaraw nga mokadlit sa ikaupat nilang sagunson nga daog sa dihang ilang sangkaon ang University of San Jose-Recoletos (USJ-R) Jaguars sa 2019 Cebu Schools Athletic Foundation, Inc. (CESAFI) Partner's Cup karong adlawa diha sa Cebu Coliseum.
Mag-abot ang duha sa alas-7 sa gabii.
Kasamtangan karong nagsolo sa liderato ang Webmasters sa seniors division bitbit ang 3-0 nga baraha.
Human gibihag ang Cebu Landmasters-University of San Carlos (USC) Warriors, ang Webmasters mitumba sa Tough Gear/Cebu Institute of Technology-University (CIT-U) Wildcats ug University of Southern Philippines Foundation (USPF) Panthers.
Samtang ang Jaguars mosuway pagposte og daog human nahisukamod duha ka higayon batok sa Southwestern University (SWU)-Phinma Cobras ug USC Warriors.
Sa juniors division, ang SWU-Phinma Baby Cobras makigharong sa University of Cebu Lapu-Lapu/Mandaue (UCLM) sa pasiunang duwa nga gikatakda sa alas-5:30 sa hapon.
Ang Baby Cobras nagkupot og 1-1 win-loss record, samtang ang UCLM wala pa'y daog sa duha nila ka duwa. (BANAT NEWS)
- Latest
