1st MGBL season kasado na karong weekend

CEBU, Philippines — Kasado na ang tanan alang sa labing unang season sa Minglanilla GSports Basketball League (MGBL) nga mosikad pinaagi sa usa ka age-group basketball tournament karong weekend. 

Gipresentar sa GSports Entertainment inabagan sa lokal nga kagamhanan sa Minglanilla ubos sa liderato ni Mayor Lani Pena, usa ka simpleng seremonyas ang mobukas sa liga nga gikatakda sa alas-8 sa buntag ugmang adlawa diha sa Minglanilla Sports Complex.

"Given the turnout of participants, this is a good start for a maiden basketball league," matud pa ni MGBL founder Gerry Canonigo atol sa usa ka press conference sa miaging adlaw didto sa Grim's Restaurant sa Upper Pakigne, Minglanilla.

Miabot ngadto sa 20 ka teams ang mokumbati pasiunang dalit sa MGBL, 13 sa 17-Under ug pito sa 13-Under age group.

Si MGBL commissioner Archemai Aquino nagkanayon nga mobanat sa Under 17 mao ang Minglanilla Archangels, Passerelle teams of Salazar Colleges of Science and Institute of Technology (SCSIT), University of San Jose-Recoletos (USJ-R), University of San Carlos (USC), Springwoods, Tulay National High School, Lipata NHS, Modena, RnT, Tungkil, Spire, Soldiers ug Pinggan.

Samtang mopakita og aksiyon sa Under 13 division mao ang Minglanilla Archangels, Tubod Elementary School, Lipata ES, Tulay U13, Red Vipers, Tungkil Warriors ug Mighty Technologian.

Bahinon sa duha ka brackets ang mga entrante. Moduwa sila ubos sa single round robin format diin ang top 2 teams matag bracket moabante sa crossover semifinals. Ang mga mananaog maoy mag-ilog sa titulo sa tinagakay nga duwa.

Gawas sa tropeyo, ang mga kampiyon mobulsa sab og P10,000 ug P6,000 sa U17 ug U13 category, samtang ang mga runner-up makubra og P5,000 ug P4,000. Ang best coach dunay P3,000 nga bonus.

Matud pa ni Canonigo, nga miporma sa MGBL sa miaging tuig agig pagtambayayong nilang Galimar Largo ug Neil Sasan, nga ang basketball mao lamang ang sinugdanan sa halapad nilang  programa sa sports alang sa mga kabatan-onan.

"Basketball is only our entry point. It is just the launching pad of our sports program," matud pa ni Canonigo nga naglaraw sab nga mobaid og mga talento sa ubang matang sa paugnat sa kusog partikular na  ang volleyball, chess, badminton ug boxing.

Testamento niana, si Canonigo maoy usa sa mga nagtukod sa 10,000 BC (Bacus Canonigo Boxing Club) nga naggalam og pipila ka mga batan-ong boksidor nga aktibong misalmot sa mga torneyo nga gipasiugdahan sa Alliance of Boxing Associations of the Philippines (ABAP) dinhi sa Sugbu. 

"We have a lot of visions here. And we are now on our first year in making our vision and mission happen," matud pa ni Canonigo. "We are still on our baby walk. We will take things onestep at a time and hopefully make this league a success."