Blazers mobangon

CEBU, Philippines — Walay laing tuyo ang Portland Trail Blazers kondili ang pagpanimalos sa ilang pag-host sa two-time defending champion Golden State Warriors sa Game-3 sa NBA Western Conference finals karong adlawa didto sa Moda Center sa Portland, Oregon.

Magsangka ang duha ka puwersa karong alas-9 sa buntag.

Human gilubong sa pasiunang duwa sa best-of-seven series, ang Blazers mipakita og igong katakus sa Game-2 diin hapit nila bihaga ang Warriors. Pakyas hinuon sila sa kinaulahian, apan ning higayona tres puntos lamang maoy deperensiya.

Bukid man tuod ang ilang tungason, apan ang Blazers kinahanglan nga makigpatay aron paghagbaon ang Warriors   sa ilang balwarte.

Angayan lamang nga buhaton kini sa Blazers gumikan kay sa kasaysayan sa NBA, wala pa'y team nga nakabangon human malubong og 3-0 sa usa ka serye.

Sa gihapon, sangonan sa Blazers ning malisud nga tahas mao ang duha nila ka bitoon nga sila si CJ McCollum ug Damian Lillard.

Hinuon makasandig sab sila nilang Rodney Hood, Enes Kanter,  Al-Farouq Aminu, Evan Turner ug Seth Curry, ang manghod sa alas sa Golden State nga si Stephen Curry.

Samtang ang Warriors daw sa dili gihapon mabangbang bisan og wala ang superstar nilang si Kevin Durant nga padayon pang nagpaalim sa iyang  injury.

Ubos sa pagpangu nilang Curry ug Klay Thompson, ang Warriors nagkamangtas pa gani nga wala si Durant. Kini tungod sa aktibong suporta nilang Draymond Green, Andre Iguodala, Andrew Bogut, Shaun Livingston, Kevon Looney, Jordan Bell ug Jonas Jerebko.