San Miguel o Magnolia?

CEBU, Philippines – Mahibaw-an na kun  mapanalipdan ba sa San Miguel Beermen ilang trono sa All-Filipino Cup o makuha ba sa ilang igsuong koponan  Magnolia Hotshots ang korona.

Ang Beermen ug Hotshots magsangka sa katapusang higayon karon nga conference sa   Game-7  karong alas-7 sa gabii didto sa Smart Araneta Coliseum.

Ang San Miguel ug Magnolia mao usab ang nag-ilog sa korona sa miaging tuig diin gitapos sa Beermen ang serye sa baraha nga 4-1.

Si Beermen coach Leo Austria miangkon nga nahimong lisud ang serye batok sa Magnolia nga mipakita usab sa ilang kadeterminado nga modaog. Ang multi-titled coach miingon nga magdepende ang duwa karon  kun  kinsa ang mas agresibo mao nga iyang gipahimangnoan iyang mga sinaligan nga pakusgan  ilang opensa.

Si San Miguel forward Christian Standhardinger miangkon nga bisan pa og giisip sila nga mas dagko itandi sa Magnolia, mas mipatigbabaw ang enerhiya sa Hotshots ilabi na gikan sa ilang mga abtik nga guwardiya.

Kun ang San Miguel mosandig nila ni Standhardinger, Arwind Santos ug MVP JuneMar Fajardo atngan nga mobida sa Magnolia ang mga point guards nga sila si Mark Barroca, Jio Jalalon ug Paul Lee.

Ang San Miguel nag-apas sa ika-26 nilang franchise title nga maoy labing daghan sa kasaysayan sa PBA, samtang ang Magnolia tuyo nga motilaw sa ika-15 nilang kampiyonato.