Sigue nagmangtas
CEBU, Philippines — Nagmangtas si Ferdinand Sigue diin miiskor siya og 23 puntos aron mangulo sa Canillas Customs Brokerage nga midaog batok sa Jam Customs Brokerage, 84-74 sa Cebu Aduana Basketball Legends (CABL) Season 1 niadtong Sabado didto sa Barangay Tinago gym, Dakbayan sa Sugbo.
Ang Canillas Customs Brokerage ni Roy Canillas nakakuha sab og igong suporta gikan ni Noel Medalle nga maaayo kaayong nakaduwa aron moambit og 13 puntos ug si Marvin Sillar nga miamot og 10 puntos.
Nagkumboya'g 33 puntos si Jovanie ug ang team manager nga si Primitivo Mondin aron mao sab ang mangulo sa napildeng Jam Customs Brokerage.
Wala sab magpaalkanse sila si Baeng Medalle ug Jaymar Elloren nga nagtampohay og 13 puntos sa Jam Customs Brokerage nga wala makalahutay sa bangis nga ataki sa Canillas Customs Brokerage.
Sa laing duwa, ang Pink Panthers mikulit sab og yano nga kadaogan dihang ilang gilubong ang Robbie Trading sa iskor nga 98-76.
Kuyaw kaayong nakaduwa si Jingjing Rama ug gipangulohan ang Pink Panthers pinaagi sa iyang 21 puntos.
Laing lima niya teammates ang naka-double digits sab. Si Jun Gayo mitikdol og 13 puntos, samtang si Jim Villa mitimang og 12 puntos. Sila si Jeff Garcia, Mondoy Aragon ug Jerry Jaca mitimbre'g 10 puntos matag usa alang sa Pink Panthers ni Art Gonzales.
Ang Robbie Trading gipangulohan ni Gilbert Guirit nga mikolekta og 20 puntos, gisundan sa team manager niining si Carl Zapanta nga mihipos og 19 puntos ug Jomar Caynila nga adunay 11 puntos.
Midaog sab ang JD&M Customs Brokerage human makaipsot sa ligas nilang duwa batok sa Petracorta, 70-68.
Sila si Generalo ug Sepe nagkumbinar og 25 puntos, samtang si Dodong Manlosa adunay 10 puntos sa JD&M ni Jonathan Matibag.
Si Francis Palero lang ang bugtong nakaiskor og double figures sa Petracorta ni Mayor Melchor Petracorta pinaagi sa iyang 18 puntos.
Ang liga gidumala nilang Janno Boniao, Noel Medalle, Ferdinand Sigue, Sidney Ganapin ug Jun Gayo. Milingkod isip consultant mao si Roy Canillas.
PUNTOS MATAG USA
Unang duwa:
JD&M (70) – Generalao 13, Sepe 12, Manlosa 10, Palad 8, Publico 8, Jamolin 6,Fuentes 3, Badon 2, Ibo 2, Inhambre 2.
Petracorta (68) – Palero 18, Largosa 8, Agustinez 7, M. Petracorta 7, Villacastin 4, Salinas 4, Villaronza 3, Engracial 2, Mabangue 2,
Cena 2, Sagarino 2.
Ikaduhang duwa:
Canillas (84) – Sigue 23, N. Medalle 13, Sillar 10, Ciabo 8, Dela Cerna 7, Marata 5, Gambe 4, Belarmino 4, Zabate 4.
Jam (74) – Jovanie 17, Mondin 16, B. Medalle 13, Elloren 13, Diano 6, Avenido 5, Taladua 4.
Ikatulong duwa:
Pink panther (98) – Rama 21 Gayo 13, Villa 12, Garcia 10, Aragon 10, Jaca 10, Dueñas 8, Gornez 2, Tan 2, Alolod 2, Robinson 2, Alinsug 2.
Robbie (76) – Guirit 20, Zapanta 19, Caynila 11, Villarias 6, Cañal 4, Ceballos 2.
- Latest
