Fajardo seguro na og laing BPC award
CEBU, Philippines – Milig-on ang kupot ni San Miguel Beermen star center JuneMar Fajardo sa unang dapit sa mga kandidato alang sa 'Best Player of the Conference' award.
Si Fajardo nanuktok sa kasaysayan isip labing unang PBA player nga makakuha og walo ka BPC award sa iyang karera.
Human miabante pag-usab ang defending champion San Miguel sa All-Filipino Cup finals, si Fajardo nakahipos og 41.4 statistical points. Ang 6-foot-11 nga Sugboanon nag-average og 20.6 points, 13.1 rebounds ug 2.5 assists karon nga conference.
Daw lisud na apsan si Fajardo ilabi na nga ang nagsunod kaniya nga si Sean Anthony sa NorthPort Batang Pier nawala na sa eksena. Si Anthony adunay 37.1 statistical points.
Ang sikit karon nga karibal ni Fajardo mao iyang teammate nga si Alex Cabagnot nga adunay 31.6 SPs.
Sa laing bahin, si Columbian Dyip guard CJ Perez maoy nag-una sa karera alang sa 'Rookie of the Year' sa iyang 28.7 SPs, gisundan ni Robert Bolick sa NorthPort (22.8 SPs) ug Javee Mocon sa Rain or Shine Painters (22.2 SPs) sa ikaduha ug ikatulo nga dapit.
- Latest