Celtics mi-ban sa ilang fan

CEBU, Philippines —  Ang Boston Celtics mi-ban sa usa nila ka fan sa tanan nilang mga duwa sud sa duha ka tuig gumikan sa ngil-ad niining mga komento nga gidirekta ngadto ni Golden State Warriors center DeMarcus Cousins.

Gipukan sa bisitang Warriors ang Celtics, 115-111 niadtong Enero 26 diin si Cousins mihipos og 15 puntos ug walo ka rebounds sa 23 minutos niining pagduwa sud sa korte.

Matud pa sa Celtics nga kalapasan sa ilang lagda ang gibuhat sa maong fan nga wala nila nganli kay menor de edad.

"On January 26, we were alerted by DeMarcus Cousins that a fan had used racially offensive language towards him," tipik sa opisyal nga pamahayag sa Celtics. "Immediately upon receiving the complaint, the fan, who was a minor, was ejected."

Human sa makuti nilang imbestigasyon, napamatud-an sa Celtics nga sad-an gyud ang fan hinungdan nga ila kining gipahamtangan og bug-at nga silot.

Sayo ning bulana, ang Utah Jazz mi-ban sab sa usa sa ilang mga fans human kini milabay og mahait nga mga pulong atol sa mainit nilang panaglalis ni Russell Westbrook sa Oklahoma City Thunder.