Tepora overweight gihapon

CEBU, Philippines — Sobra  pa gihapon  og timbang ang Sugboanong world boxing champion nga si Jhack Tepora duha ka adlaw sa dili pa siya modepensa sa iyang korona.

Si Tepora gikatakda nga   manalipod  sa  iyang WBA interim featherweight title batok sa Mehikanong si Hugo Ruiz sa undercard sa WBA welterweight championship tali nilang Manny Pacquiao ug Adrien Broner ugmang adlawa didto sa MGM Grand Garden Arena sa Las Vegas, Nevada.

Apan nameligro ang 26-anyos nga si Tepora nga mahuboan sa iyang bakus bisan og wala pa makasaka sa ring gumikan kay hangtod 'overweight' pa gihapon siya.

Masaligon hinuon si Tepora nga makuha ra niya ang saktong timbang atol sa official weigh-in karong adlawa.

"Kaya. Papawis lang,"  matud pa ni Tepora segun sa taho ni Dino Maragay sa Philstar.com.

Samtang ning pagsulat, si Tepora mitimbang og 132 ka libras. Laktod pagka sulti, kinahanglan siyang   magpakuyos  og unom   ka   libras   aron  makuha  ang 126 nga  timbang   ubos    sa featherweight division.

Wala hinuon gibati og kabalaka si Tepora kay anad na man siya niining klase sa sitwasyon.

"Parang nasanay na yung katawan ko sir, eh," matud pa ni Tepora, nga wala pa'y pilde sa 22 ka away nga gidayan-dayanan og 17KOs.