Warriors 51 puntos sa 1st qtr

CEBU, Philippines – Ang two-time defending champion Golden State Warriors mikulit og NBA record human mipabuto og 51 puntos sud lang sa first kuwarter sa 142-111 nilang kadaogan batok sa Denver Nuggets kagahapon didto sa Pepsi Center sa Denver, Colorado.

Grabe kaayo ang pagpanginit sa Warriors kay miposa dayon sila og 10 ka 3-pointers sa unang kuwarter pa lamang sa aksiyon nga usa sab ka franchise record.

Ilang gibuak ang karaang marka alang sa labing daghang puntos sa unang kuwarter nga 50 nga gihimo sa Phoenix Suns batok gihapon sa Denver niadtong Nobiyembre 10, 1990.

"That was a fireworks show," matud pa ni Warriors coach Steve Kerr kabahin sa sayo kaayo nilang pagmangtas.

Sila si Stephen Curry ug Klay Thompson parehong mikadlit og 31 puntos, samtang si Kevin Durant miamot og 27 puntos. Si Draymond Green miiskor lamang og kuwatro puntos, apan mipasa og 13 sa 38 ka assists sa Warriors.

Si Michael Beasley adunay 22 puntos aron pangulohan ang lima ka Nuggets nga miposte og double figures, apan dili kini igo aron ilang mapiog ang eksplosibong opensiba sa Warriors.

Sa laing aksiyon, si Joel Embiid mihipos og 31 puntos ug 13 ka rebounds ug si Ben Simmons mikolekta og 20 puntos, 11 ka rebounds ug siyam ka assists sa dihang gipatikangkang sa Philadelphia 76ers ang Minnesota Timberwolves, 149-107.

Didto sa Indianapolis, sila si Bojan Bogdanovic ug Tyreke Evans mitali og 20 puntos matag usa ug si Myles Turner midonar og 18 puntos sa dihang gilubong sa Indiana Pacers ang Phoenix Suns, 131-97.

Wala sab magpabitin si Giannis Antetokounmpo nga mibahog og 12 puntos, 10 ka rebounds ug 10 sab ka assists sa ikaupat niyang "triple-double" karong season nga maoy nagtuboy sa Milwuakee Bucks ngadto sa 124-86 nga paglampaso sa Miami Heat.

Sa Atlanta, si John Collins mikamada og 26 puntos sa dihang gibihag sa Hawks ang Oklahoma City Thunder, 142-126.