Kasaysayan nagpaabot sa Philippine basketball
CEBU, Philippines — Nagmalampuson ang Sisters of Mary School sa tinguha niining mokulit og world record sa labing dako nga 3X3 basketball event pinaagi sa Chooks-to-Go Samahang Basketbol ng Pilipinas (SBP) 3x3 Festival niadtong weekend.
Niadtong Sabado, miabot ngadto sa 1,111 ka mga lalaki nga gibuak sa 227 ka teams ang miduwa og 444 ka games sa 50 ka half-courts sa SMS-Boystown didto sa Minglanilla. Pagka sunod adlaw, 1,588 ka mga babaye ang miduwa og 3X3 basketball sa 36 ka half-courts sa SMS-Girlstown campus sa Dakbayan sa Talisay.
Sa kinatibuk-an, ang makasaysayanon nga kalihukan nakahakot og 3,036 ka mga partisipante nga igo kaayong mibuak sa karaang FIBA-record nga 1,898.
"When we were just in the planning stages of the event, we expected that we will break the record. But we did not expect that it would be by a wide margin," matud pa ni Chooks-to-Go president Ronald Mascariñas.
Maghuwat na lang karon ang Chooks-to-Go, SBP, SMS ug ang mga Sugboanon kun kanus-a hingpit nga makauli sa Pilipinas ang kasaysayan gumikan kay ang FIBA mosusi pa man sa mga dokumento ug beripikahon kun nakab-ot ba gyud nila ang maong rekord. (BANAT NEWS)
- Latest
