Rockets kaging sa Bucks

CEBU, Philippines — Ang kandidato sa Milwaukee pagka-Most Valuable Player sa NBA karong season nga si Giannis Antetokounmpo mikadlit og 27 puntos sa dihang gibihag sa Bucks si reigning MVP James Harden ug ang Houston Rockets, 116-109, kagahapon didto sa Toyota Center sa Houston Texas.

Si Antetokounmpo milangkat sab og 21 ka rebounds alang sa Bucks nga miresbak human ma-alkansi og sayes puntos sa halftime, 54-60, dayon na sa pagputol sa 10 ka sagunson nga daog sa Rockets didto sa korte niini.

Ang Bucks mao nay mikontrolar sa duwa sa katapusang kuwarter diin sila naglabaw og 15 puntos. Igo lamang nakasikit ang Rockets ngadto sa tres sa nahibilin nga dos minutos.

Ang Bucks padayong nagkupot sa labing nindot nga 29-11 record sa liga karong season.

Si Harden mitapos uban ang 42 puntos ug 11 ka rebounds apan nahoyhoy ang abaga human sa duwa, samtang si Malcolm Brogdon dunay 24 puntos sa pilderong Rockets.

Didto sa Boston, ang Celtics naglabaw og 31 puntos sa usa ka higayon sa 135-108 niining paglampaso sa Indiana  Pacers.

Sila si Marcus Morris ug Jaylen Brown parehong mi-iskor og 22, samtang si Jayson Tatum mitampo og 20 puntos alang sa Celtics nga nakasagunson og upat na ka daog.

Sa Washington, ang Wizards mibugha sa Philadelphia 76ers, 123-106, ubos sa pagpangu ni Bradley Beal nga miratsada og 34 puntos.

Sa uban pang mga duwa, ang Brooklyn Nets nakabawi human malubong og 19 puntos sa first dayon na ngadto sa pagpatikalbong sa Atlanta Hawks, 116-100, samtang si Anthony Davis mipupo og 38 puntos ug 13 ka rebounds sa ikatulong sunod-sunod nga daog sa New Orleans Pelicans.