Bulldogs, Alits nangaparot

CEBU, Philippines — Parehong nangapilde ang 'twice-to-beat' Bulldogs ug Alits teams   sa semifinals sa Sunday.com 5th Conference League 2018 niadtong Miyerkules didto sa Benedicto gym sa A.S. Fortuna, Mandaue City.

Ang Bulldogs giihaw sa Uniform Solutions sa iskor nga 91-77, samtang ang defending champion Alits gianukan sa Half-Baked, 84-70.

Bisan pa sa ilang kapildihan ang Bulldogs ug ang Alits nga maoy nagsangka sa finals sa miaging duha ka tuig, aduna pa gihapo'y purohan nga mag-abot sa finals kini kun makabawos sila sa knockout match karong Disyembre 26 diha gihapon sa Benedicto gym.

Lima ka players sa Uniform Solutions ang miiskor og double figures pinangulohan ni Neil Ibarita nga mitabas og 19 puntos. Sila si Andrew, Jonas Ranolo, Jaylord Maisling ug Mitch Meneses mirehistro sab og double digits sa Uniform Solutions, kansang duwa wala gyud molubad gikan sa pagsugod hangtod sa katapusang gutlo.

Ang Bulldogs gipangulohan sab ni Jeric Gonzaga nga mikawhat og 16 puntos, gisundan ni Jobus Bustamante sa iyang 14 puntos. Ang presidente nga si Camilo 'Tata' Nadera mitampo og 12 puntos, samtang si Allan Bacus miambit og 10 puntos sa napildeng Bulldogs.

Sa laing bahin, si Monte mao lang ang miiskor og double figures sa Half-Baked pinaagi sa iyang 10 puntos, apan halos tanan nilang players ang nakaiskor hinungdan nga nakabangon kini human malubong og 11 puntos sa first quarter, 11-22.

Nangulo sa Alits mao si Jay Chris Shawn Entrampas sa iyang 12 puntos, gisundan nilang Marco Antonio Sanchez ug Rene 'Dodoy' Grafe nga nagtampohay og 10 puntos sa Alitz nga wala na makarekober human banati atol sa third quarter.

Ang tinuig nga liga gipaluyohan sa VECO, Camilo 'Tata' Nadera, Congressman Jonas C. Cortes, Yamaha DES Strong-Cambaro branch ubos sa manager niining si Alfred Pasana,  Marca Leon, Mr. & Mrs. Naig, Wendell Suico ug Alex Malakhooti.

PUNTOS MATAG USA

Unang duwa:

UNIFORM Solutions (91) – Ibarita 19, Andrew 13, Ranolo 12, Maisling 10, Meneses 10, Rendo 9, Baroman 7, Piano 6, Rogen 5.

BULLDOGS (77) – Gonzaga 16, Bustamante 14, T. Nadera 12, Bacus 10, Gafe 8, Cabahug 4, Ygot 4, Tan 3, Antigua 2, Apa Sr. Palabay 2.

Ikaduhang duwa:

HALF-BAKED (84) – Monte 10, A. Cabahug 9, Solon 9, Martel 9, K. Cabahug 8, Soon 7, Sanchez 6, Cortes 6, Manzanares 6, C. Cabahug 4, Sampang 4, Vergacer 3, Doodz 2, Gullera 1.

ALITS (70) –  Entrampas 12, M. Sanchez 10, T. Grafe 10, Omolon 9, G. Antigua 9, Agbay 7, M. Nadera 4, Fuentes 3, Latonio 2, D. Antigua 2, Kons Sanchez 2.