Lady Red Spikers itataya ang liderato
MANILA, Philippines — Itataya ng San Beda University ang imakuladang rekord nito sa laban sa College of St. Benilde sa pagpapatuloy ng NCAA Season 94 women’s volleyball tournament ngayong araw sa San Juan City.
Nakatakda ang bakbakan ng Lady Red Spikers at Lady Blazers sa alas-12 ng tanghali na susundan ng engkuwentro ng Lyceum of the Philippines at Mapua University.
Nasa unahan ng standings ang San Beda at nagdedepensang Arellano University na taglay ang parehong 5-0 marka.
Kaya’t ang panalo ng Lady Red Spikers sa Lady Blazers ang magdadala sa kanila sa solong pamumuno.
Hindi madali ang daang tinahak ng San Beda bago kunin ang ikalimang panalo.
Kinailangan nito ng solidong laro ni team captain Cesca Racraquin sa fifth set para kunin ng Lady Red Spikers ang 17-25, 25-13, 25-9, 21-25, 15-11 desisyon laban sa Jose Rizal University noong Huwebes.
Kumana si Racraquin ng 25 hits kabilang ang krusyal na mga puntos sa huling bahagi ng laro
Ngunit hindi lang si Racraquin ang magbibigay ng sakit ng ulo sa Benilde dahil umaariba rin sina Nieza Viray, Trisha Paras at Satrianni Espiritu na malaki ang kontribusyon sa kanilang huling mga laro.
Galing naman ang Benilde sa 25-11, 25-20, 25-13 demolisyon laban sa EACnoong Martes.
Gaya ng dati, aasahan ng Benilde sina Klarisa Abriam, Rachel Austero at Jan Daguil para maipagpatuloy ang kanilang magandang laro.
Nakatali sa two-way tie ang Benilde sa No. 3 spot kasama ang San Sebastian College-Recoletos tangan ang 3-1 marka.
- Latest
