Didal usa na ka 'pro'

CEBU, Philippines — Ang Sugboanang skateboard sensation nga si Margielyn Didal miangkon og laing kadungganan isip labing unang Pinay nga nahimong pro sa skateboarding.

Naangkon ni Didal ang dakong surprisa niadtong weekend didto sa Hong Kong.

Bugtong nasayran sa 19-anyos nga si Didal mao nga motambong lamang siya sa 'official release' sa bag-ong sapatos sa New Balance Numeric ug sa iyang board sponsor, ang Eightfivetwo o 8Five2.

Apan mas labaw pa ang naangkon ni Didal gumikan kay gisaka man siya sa Eightfivetwo ngadto na sa usa ka 'pro' pinaagi sa paglusad og skateboard ubos sa iyang pangan.

"Margie just turned pro. She received her first signature board," matud pa ni Monty Mendegoria, ang presidente sa Skateboarding and Roller Sports Association of the Philippines, Inc. (SRAP).

Makita ang hulagway sa Asian Games gold medal ni Didal sa iyang skateboard.

Gipasabot ni Mendeogoria nga ang usa ka sponsor makabuot nga tawgon ang usa ka skater nga 'pro'.

"If you get your own skate merchandise, that’s the time you turn pro. They have invested a big amount of money on you," dugang pa ni Mendegoria.

Bisan og usa na siya ka pro, si Didal sakop gihapon sa Philippine team. Padayon karon siyang nangandam alang sa Skates Exchange didto sa Tokyo karong Disyembre 1. Human niini, mobalik siya sa Amerika aron magbansay-bansay alang sa usa ka Olympic qualifying event, ang Street League didto sa Brazil karong Enero. (BANAT NEWS)