Lebron misaka sa MVP rankings
CEBU, Philippines — Milayat si LeBron James gikan sa ikasiyam ngadto sa ikaduhang dapit sa senemanang NBA rankings niadtong mga kandidato pagka-MVP sa liga karon nga season.
Kini gumikan sa dakong papel ni James sa upat ka sagunson nga daog sa Los Angeles Lakers ug ikalima sa miagi nilang unom ka duwa nga nag-isa sa ilang rekord ngadto na sa 8-6.
Ang four-time MVP miburak og 44 puntos, 10 ka rebounds ug siyam ka assists sa miagi nilang kadaogan batok sa Portland TrailBlazers. Sa maong duwa, iyang naapsan si Wilt Chamberlain sa ikalimang puwesto sa NBA all-time scoring list.
Sa kinatibuk-an karon nga season, si James dunay stats nga 27.6 points, 7.9 rebounds, 7.2 assists ug 1.5 steals matag duwa.
Nag-una gihapon sa listahan si Giannis Antetokounmpo nga dunay average nga 25.8 points, 12.7 rebounds, 5.6 assists ug 1.4 blocks matag duwa.
Ikatulo mao si Damian Lillard sa Portland TrailBlazers nga dunay 26.4 points, 6.2 assists ug 5.2 rebounds matag duwa ug nagsunod sila si Kawhi Leonard sa Toronto Raptors (24.2 pts., 7.8 rebs, 3.2 assists) ug Stephen Curry sa Golden State Warriors ( 29.5 punrtos, 6.1 assists, 5.0 assists).
Naglangkob sa top 10 sa ikatulong semana sa "2018-2019 Kia Race to the MVP Ladder" mao sila si Anthony Davis sa New Orleans Pelicans, Kevin Durant sa Golden State Warriors, Joel Embiid sa Philadelphia 76ers, Kyle Lowry sa Toronto Raptors ug Nikola Jokic sa Denver Nuggets.
Naapil sab sa karera sila si James Harden sa Houston Rockets; Kyrie Irving sa Boston Celtics; Victor Oladipo sa Indiana Pacers; Kemba Walker sa Charlotte Hornets ug Russell Westbrook sa Oklahoma City Thunder.
- Latest