Durant mohawa sa Warriors?
CEBU, Philippines – Daghan karon ang nagtuo nga dili na magsul-ot sa uniporme sa Golden State Warriors si reigning finals MVPKevin Durant.
Si Durant nga anaa na sa katapusang season sa Warriors giingon nga wala na malipay sa maong koponan.
Nakapalapad kini og maayo sa pagtuo sa mga NBA analysts nga mahitabo kini tungod sa nahitabong panagbangi ni Durant ug sa teammate niining si Draymond Green niadtong Miyerkules.
Klaro kaayo naglagot si Durant gumikan sa pagsige og kupot ni Green sa bola inay nga ipasa ngadto kaniya sa katapusan nilang posisyon nga posible pa untang makapadaog kanila.
Resulta, ang Warriors napilde sa L.A. Clippers, 121-116.
Ang panaglalis miresulta sa pagsuspenso sa Warriors ni Green, kinsa mihingan og ngil-ad ngadto kang Durant.
Bisan pa og gisuspenso si Green, si Durant daw wala na malipay sa team ug miaslom na ang relasyon niini dili lang ni Green, apil na sab ang ubang players ug sakop sa coaching staff.
"With what was said, there is already no way Durant is coming back," matud pa sa wala magpahingalan nga player sa Warriors sa Fox Sports.
Ang two-time champion nga si Durant mao karon ang giatngan nga free agent human sa season. Lakip sa mga sayong gitan-aw nga layatan ni Durant kun mahitabo iyang paghawa sa Warriors mao ang New York Knicks, Boston Celtics ug L.A. Lakers.
- Latest