San Beda solido sa No. 2
Laro Ngayon (The Arena)
12 nn. CSJL vs MU (Srs)
2 p.m. CSB vs AU (Srs)
4 p.m. UPHSD vs LPU (Srs)
MANILA, Philippines — Pinasuko ng nagdedepensang San Beda University ang Emilio Aguinaldo College, 76-57 upang mapatatag ang kapit sa No. 2 spot sa NCAA Season 94 men’s basketball tournament kahapon sa The Arena sa San Juan City.
Mabangis si Robert Bolick na bumanat ng double-double na 20 points at 10 rebounds kasama pa ang limang assists at tatlong steals para dalhin ang Red Lions sa ika-12 panalo sa 13 laro.
Nakatuwang nito si Javee Mocon na umariba naman ng 11 markers at pitong boards habang pare-parehong may anim na puntos sina Donald Tankuoa, Calvin Oftana at AC Soberano.
Nanganganib na masibak ang Generals na nalaglag sa 2-10 marka.
Nangibabaw para sa EAC si Cameroonian Hamadou Laminou tangan ang 15 puntos at 10 boards samantalang naglista naman sina JP Magullano (12) at Jethro Mendoza (10) ng kani-kanilang double figures.
Subalit malaking hadlang ang 26 turnovers - 16 sa second half - na nagawa ng Generals para mabigong masundan ang kanilang magandang ratsada sa first half.
Sa unang laro, sumandal ang San Sebastian College-Recoletos sa matikas na laro ni Allyn Bulanadi upang hatakin ang 82-75 panalo laban sa Jose Rizal University at manatiling buhay ang kanilang tsansa sa Final Four.
Nagpasabog si Bulanadi ng career-high 27 points kabilang ang 10 sa first quarter para pamunuan ang Stags na mapigilang sumabog ang Heavy Bombers.
Umangat sa 4-9 ang San Sebastian ngunit kailangan nitong walisin ang kanilang huling limang laro para higit pang palakasin ang kanilang pag-asa sa semis.
Tuluyan nang namaalam sa kontensiyon ang Heavy Boombers na nahulog sa 2-11 marka.
- Latest