Pacquiao mokiha sa top rank

CEBU, Philippines – Si Manny Pacquiao mianunsiyo niadtong Lunes sa gabii nga mohimo siya og legal nga aksiyon batok sa kanhi niya promoter nga Top Rank Inc. ug sa uban pang mga hingtungdan gumikan sa wala pagbayad niini sa TV rights sa iyang away batok ni Lucas Matthysse niadtong Hulyo.

Sa usa ka opisyal nga pamahayag, si Pacquiao nagkanayon nga giandam na sa iyang legal team ang tanang mga dokumento nga ilang gikinahanglan aron pormal na nilang mapasaka ang kaso batok sa Top Rank ug sa pipila ka mga indibidwal gumikan sa wala niini paghatag sa iyang bahin sa kita sa telebisyon atol sa sangka nilang Matthysse ug ingon man sa pagdiskaril sa umaabot niyang mga away.

Gipalukapa ni Pacquiao si Matthysse sa ikapitong hugna aron pagbira sa WBA welterweight title niadtong Hulyo 15 didto sa Axiata Arena sa Kuala Lumpur, Malaysia.

Ang MP Promotions ni Pacquiao maoy co-promoter sa maong away uban sa Golden Boy Promotions ni Oscar de la Hoya, nga maoy nag-representar ni Matthysse.

Naapil sa eksena ang Top Rank ni Bob Arum gumikan kay mao kini ang gitahasan pagpasalida sa away gawas sa nasud.

Apan si Pacquiao mipalag kay wala pa niya nadawat ang iyang bahin sa pagpasalida sa away pinaagi sa live streaming didto sa Amerika, Canada ug Puerto Rico.

Matud pa sa kampo ni Pacquiao nga sigun sa ilang nasabotan sa Top Rank, si Pacquiao dunay 85 porsiyento nga bahin sa  broadcast revenue, samtang ang nahibilin adto mapunta sa Top Rank.

Apan hangtud karon wa gihapoy naabot bisan og sinsiyo sa iyang mga kamot, butang nga gikasagmuyo og maayo ni Pacquiao.