Khan gigil nang makalaban si Pacquiao
MANILA, Philippines — Numero unong prayoridad ni Amir Khan si eight-division world champion Manny Pacquiao sa listahan ng kanyang sunod na makakalaban.
“There’s a few options out there for me but Pacquiao in my opinion is probably option number one,” pahayag ni Khan sa panayam ng Sporting News.
Maraming pinagsamahan sina Khan at Pacquiao.
Sa mga nakalipas na taon, iisa ang kanilang trainer sa ngalan ni American coach Freddie Roach.
Ngunit kumalas si Pacquiao kay Roach at kasalukuyang kasama sa training camp si Australian Justin Fortune.
Malalim ang pagkakaibigan nina Khan at Pacquiao pero kailangan itong isantabi sa oras na magkrus ang kanilang landas sa ibabaw ng ring.
“That’s a fight I would love to have because there’s a lot of history we have between each other. We’ve trained with each other, we are friends, but sometimes we have to put our friendship to the side, so I think that (Pacquiao fight) would be perfect,” dagdag ni Khan.
Sa katunayan, na-knockout na ni Pacquiao si Khan sa isang sparring session ng dalawa noong 2014 sa Wild Card gym sa Los Angeles, California habang naghahanda ang Pinoy champion sa pagdepensa nito ng world welterweight title laban kay Chris Algieri.
Nakatakdang ipagtanggol ni Pacquiao ang kanyang WBA welterweight title sa Disyembre ngunit wala pang malinaw na pangalang posible nitong makaharap.
Nasungkit ng Pambansang Kamao ang WBA belt matapos itala ang seventh-round technical knockout win laban kay Lucas Matthysse ng Argentina noong Hulyo 15 sa Axiata Arena sa Kuala Lumpur, Malaysia.
Tahimik ang kampo ni Pacquiao ngunit posibleng gumugulong na ang negosasyon at inaasahang ilalatag nito ang pinal na desisyon sa oras na maisara na ang deal.
Isiniwalat ni Mikey Garcia kamakailan na nakikipag-usap na ito sa Team Pacquiao para sa posibilidad na paghaharap. (CCo)
- Latest
