Slaughter maoy gihuwat ni Guiao

CEBU, Philippines – Mitug-an si Gilas Pilipinas coach Yeng Guiao nga dali na lang kaniya pagpili og Final 12 nga moduwa sa second round sa 2019 FIBA World Cup qualifiers kung hingpit na nga tugtan sa FIBA si Greg Slaughter nga moduwa isip usa ka local player.

Nasayran nga si Slaughter misumitir sa mga dokumento ngadto sa FIBA aron pamatud-an nga angayan siya isipin nga usa ka local player ug dili isip usa ka naturalized player bisan pa og didto siya natawo sa gawas sa nasud.

“Kung na-submit na, wala na tayong magagawa except to wait. But I’m not really sure when they will make that final decision or approval,” matud pa ni Guiao sa Spin.ph.

Si Guiao una nang miingon nga dakung butang kung makaduwa uban sa national team ang 7-footer center ilabi na nga wala si JuneMar Fajardo kinsa nakahiagum og injury.

Kung makaduwa, si Slaughter maoy tahasan nga mupugong sa mga higante sa Iran sa ilang sangka karong Septiyembre 13.

Nanghinaot si Guiao nga makapagawas dayun siya og final lineup sa dili pa ang Septiyembre 10 nga maoy petsa sa ilang paglarga.