Aces gusto mobawos sa beermen pagsugod sa "best-of-five" semis
CEBU, Philippines – Panimalos maoy tuyo sa Alaska Aces ngadto sa San Miguel Beermen sa pagsugod sa PBA Commissioner's Cup 'best-of-five' semifinals series karong adlawa didto sa Mall of Asia Arena.
Ang duwa sugdan sa alas-4:30 sa hapon.
Buhi pa gihapon sa panumduman sa Alaska ang dili hikalimtan nilang kapildihan niadtong 2016 Commissioner's Cup finals.
Naglabaw sila sa serye, 3-0 ug usa na lang unta ka daog aron makampiyon, apan gibaraw sila dihang giharos sa San Miguel ang nahibiling upat ka duwa.
Ning higayona, ang Alaska gihulagway nga mas lig-on tungod kay himsog ilang mga sinaligan sama nila ni Vic Manuel, JV Casio, Sonny Thoss ug Jeron Teng.
Si San Miguel head coach Leo Austria mipahimangno usab sa iyang import nga si Renaldo Balkman nga mangandam kay atubangon niya ang champion import nga si Diamon Simpson.
Giatngan sab karon kon moduwa ba si Alaska star player Calvin Abueva nga miserbisyo og 'indefinite suspension' niadto pang miaging buwan.
- Latest