Beteranong si Taulava aduna pa’y gustong ipamatuod
CEBU, Philippines – Isip labing hinog nga active PBA player karon, ang NLEX Road Warriors center nga si Asi Taulava gusto nga mosakmit og laing dungog pinaagi sa pagdaog sa “Obstacle Challenge” atol sa PBA All-Star Week nga gitakda sunod buwan didto sa Batangas City.
Ang 45-anyos nga si Taulava laraw nga mamahimong labing unang sentro nga modominar sa maong kompetisyon nga gihimo alang sa mga point guard tungod kay naglakip kini sa paspas nga dribbling, passing ug shooting.
Ang PBA nakahukom nga pasalmuton ang mga bigmen sa liga sa maong kompetisyon aron sa pagdugang og lingaw.
Gawas ni Taulava laing mga higanteng player nga mosuway sa posisyon isip guwardiya mao sila si Sonny Thoss sa Alaska Aces, Kelly Nabong sa GlobalPort Batang Pier, Ken Bono sa Meralco Bolts, Beau Belga sa Rain or Shine Elasto Painters ug Yancy De Ocampo sa San Miguel Beermen.
Ang PBA All-Star sugdan sa Mayo 23 ug gibahin sa tulo ka leg sa managlahing binyu nga naglakip sa Batangas City Coliseum, Davao del Sur ug Iloilo City.
- Latest
