3 Pinoy boxers pasok sa semis sa Russia meet

MANILA, Philippines — Pasok sa semis ang tatlong Pinoy boxers sa 2018 Konstantin Korotkov International Memorial Boxing Tournament na ginaganap sa Khabarovsk, Russia.

Ipinagpatuloy nina James Palicte, Aira Villegas at Women’s World Cham­pionship silver medalist Nesthy Petecio ang matikas na ratsada sa kani-kanilang dibisyon upang makapasok sa medal round.

Pinataob ni Palicte si Guseyn Magomedov ng Russia sa men’s lightweight - 60 kg. (5-0) habang nagtala ng panalo si Villegas kay Nandintcecheg Myagmardulam ng Mongolia sa women’s 48-51 kg. class (5-0).

Hindi rin nagpahuli si Petecio na kumana ng sariling 5-0 desisyon laban kay Karina Tazabekova ng Russia sa women’s 57kg. category.

Sa semis, susuntok si Palicte sa mananalo kina Terik Petrosyan ng Armenia at Darkhan Zhumsakbaev ng Kazakhstan.

Nag-aabang na rin si Villegas sa kanyang makakasagupa sa semis sa mananalo kina Chang Yuan ng China at Gelyusa Gaieva ng Russia gayundin si Petecio na lalarga sa mananaig kina Ilona Nad ng Hungary at Yin Junhua ng China.

Bigo namang umabante sa semis si Joel Bacho na yumuko kay Liao Wen Jiu ng China sa quarterfinals ng men’s welterweight (69 kg.) ng torneong may basbas ng International Boxing Association.

Nakatakda ring sumalang sina Southeast Asian Games champion Eumir Felix Marcial at Carlo Paalam sa kani-kanilang dibisyon.

Hahataw si Marcial kontra kay Erik Mendoza ng Sweden sa men’s middleweight (75 kg.) habang aariba si Paalam laban kay Boris Sidorov ng Russia sa men’s light flyweight (46-49 kg.).