Talisay mikastigo sa minglanilla sa Gov's Cup
CEBU, Philippines – Nagbangis dayon ang Talisay City Aquastars pagsugod sa ilang kampanya human nila gimasaker ang defending champion Minglanilla Archangels, 97-67 sa South Division Bracket 1 sa 2nd Cebu Governor’s Cup Inter-Cities and Municipalities Under-21 Developmental Basketball Tournament niadtong Biyernes didto sa San Fernando Sports Complex.
Sa halftime pa lang daan, dili na matuis kun asa punting ang resulta sa duwa human ang Aquastars miabante og 34 puntos.
Ilang giablihan ang duwa pinaagi sa pagtagak og 28-9 nga bomba ug gitiwasan og kulata ang Minglanilla human milusad og 30-15 run sa ikaduhang kuwarter aron pagpaburot sa ilang labaw ngadto sa 58-24. Wala na makabangon pa ang Minglanilla sukad niadto.
Si Jay Deiparine maoy nangu sa Talisay uban ang 25 puntos, samtang sila si Raffy Bacasmas ug Kendrick Bacasmas nagkumboya’g 33 puntos.
Human miratsada og 30 puntos sa iyang debut sa Gov's Cup, si Steve Nash Enriquez naangklahan ngadto lamang sa 15 puntos alang sa Minglanilla.
Sa uban pang mga duwa sa South, ang San Fernando Spartans midemolis sa Carcar City, 90-74, ang Sibonga mikulit sa ikaduha nilang daog human gipilde ang Dalaguete AgriSaurs, 76-57, samtang ang Boljoon mipukan sa Argao, 55-47.
Didto sa North, ang Tuburan nakaipsot batok sa Bogo City, 74-73 sud sa overtime sa North Division Bracket 3, ang Balamban milubong buhi sa Tabogon, 127-82, samtang gilubong sab sa Tabuelan ang Asturias, 94-64.
Sa isla sa Bantayan, ang Bantayan Seafarers mipakaging sa Daanbantayan, 113-93, samtang ang Madridejos mipaluhod sa Santa Fe, 115-106.
- Latest
