Pistons tagak na’s playoffs
CEBU, Philippines — Natagak na sa playoffs ang Detroit Pistons human mapilde ngadto sa Philadelphia 76ers, 115-108 sa NBA kagahapon didto sa The Palace sa Auburn Hills, Michigan.
Si JJ Redick mibahog og 25 puntos sa Sixers nga miposte sa ika-12 nilang sagunson nga daog.
Padayon nga miratsada ang Sixers bisan og wala ang na-injured nilang bitoon nga si Joel Embiid sud sa upat na ka duwa.
“Everyone in this room has stepped up since Joel went down, and we know we're capable of winning games without him,” matud pa ni Ben Simmons.
“We told him to get ready for the playoffs and that we’ll take care of everything else. Now we're showing that we can do that,” dugang pa sa Australyanong guwardiya.
Napakgang ang lima ka sunod-sunod nga daog sa Pistons ug ang ilang pilde nakahatag og luna sa playoff sa Milwaukee Bucks.
Hitsas na karon ang teams sa Eastern Conference playoff, apan wala pa mahibaw-i kun kinsa ang mag-abot sa unang hugna.
Si Anthony Tolliver mihipos og 25 puntos alang sa Pistons nga wala na sab makapahimus sa serbisyo ni Blake Griffin nga nakapalta og upat na ka duwa gumikan sa injury sa tiil.
Sa laing aksiyon, si Kelly Olynyk mitali og 19 puntos sa dihang gilitson sa Miami Heat ang Atlanta Hawks, 115-86.
Gilubong sab sa New Orleans Pelicans ang Memphis Grizzlies, 123-95, samtang gilumsan sa Los Angeles Lakers ang San Antonio Spurs, 122-112 ug ang Orlando Magic nakaeskapo bitbit ang 105-100 nga daog batok sa Dallas Mavericks.
- Latest